مع الاعتذار لكل مصرى!!!!!!!!!!!!

مع الإعتذار لكل الأخوه المصريين

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

هذة القصيدة للشاعر
أحمد فؤاد نجم

طبعا أحمد فؤاد نجم

ههههههههه

ده باشا وربنا

مشكورة ياأميرة المنتدى على الموضوع الجميل ده

ميرسي اليك انت كتير ع مرورك الجميل يا
Mr.Beast
نورت كتير التوبيك بمرورك الجميل والله

نايس توبيك
ياتوتا
وأنا برد على
أحمد فؤاد نجم
وبقول
لما تذاكر
وماتنجحش
لما تتخرج
وماتشتغلش
ولما تحب
وماتتجوزش
يبقى أنت أكيد
أكيد فى مصر

ههههههههههههههههههههه
اكيد اكيد ف مصر
ميرسي ع مرورك الجميل
نورت كتير بمرورك الجميل